الرئيسية » مشاركات القراء » باسمة جزائري تكتب: ولك أنا مو سورية ؟ 
السيدة باسمة جزائري
السيدة باسمة جزائري

باسمة جزائري تكتب: ولك أنا مو سورية ؟ 

باسمة جزائري: ولك أنا مو سورية؟
والله أنا سورية.. أمي وأبي سوريين.. جدي وستي سوريين.. ولدت وربيت وكبرت بسورية متلكم.. جبت ولادي وربيتهم وكبرتهم بسورية.. وعشت 53 سنة من عمري بسورية.
ولك أنتو مو سوريين؟ أنتو هلأ عم تقروا كلامي لأنكم سوريين.. أنا كل أصدقائي سوريين.. وكل أهلي سوريين.. وكل الموجودين على قائمة أصدقاء الفيس بوك سوريين.. حتى اللي مو حاملين الجنسية السورية سوريين.
أنا ما عم أجي لهون كل يوم لأعرف شو طبختو..
ولا عم أفتح الفيس بوك لأقرا شعركم وتحكوا لي مين حبيتو ومين عشقتو..
ما بدي شوف صور ولادكم.. وآخر همي شوف آخر سيلفي بآخر مطعم بآخر سهرة..
أنا عم أجي لشوفكم شو عملتو..
أنا مريضة.. من 3 سنين. أنتو وين صحتكم؟
أنا شبه عاجزة.. أنتو وين قوتكم؟
أنا عديمة الحيلة.. أنتو وين حيلتكم؟
أنا ما معي مصاري.. أنتو وين ثروتكم؟
أنا كبيرة بالعمر.. أنتو وين صباكم؟
أنا هون لأني سورية وبدي أعرف شو عملتو يا سوريين للسوريين.
لأني لو ما طلعت من بيتي بقدسيا بالوقت المناسب كنت هلأ تحت الحصار متل قدسيا..
ولأني لو ما طلعت من المعتقل متل اليوم من 3 سنين كنت لهلأ بالمعتقل أنا وبنتي..
لأني كان ممكن كتير كون هلأ جوعانة بمضايا..
كان ممكن كتير يكونوا أحفادي هنن الروح الهشة اللي بين الجلد والعظم بالغوطة..
كان ممكن كون تحت القصف والبراميل بأي مكان بسورية..
وبدي أعرف..
شو كنتوا عملتولي لو كنت أنا اللي هونيك.
ولك أنا سورية يا سوريين..
سورية يا ولاد بلدي..
وأنتو؟ أنتو مو سوريين؟

السيدة باسمة جزائري، سورية حرة