الرئيسية » فيسبوكيات » د.شذى الخليل :”الباحثون السوريون” يترجمون أبحاث غيرهم ويضعونها بإسمهم

د.شذى الخليل :”الباحثون السوريون” يترجمون أبحاث غيرهم ويضعونها بإسمهم

الدكتورة : شذى الخليل ، فيسبوك

مبارح تحداني البعض رد على “الباحثون” السوريون بنقض نظرية التطور الداروينية .. حطيت باحثون بين قوسين لإنهم فقط مترجمون وكلمة باحث إلها معنى آخر والكل بيعرفه أقله يكون عندهم مخبر وعم يشتغلوا بحث والصفحة عم تنشر نتائج أبحاثهم الخاصة …. بينما إنها ترجم أبحاث غيرك وتكتب اسمك باحث سوري فهي صارت %^$#%

بغض النظر إنه مبارح الأدمن “الباحث” كان فايت بالحيط و خبص الاصطفاء بالتطور (خطأ أسوأ من الكفر عالمستوى العلمي) بأجوبته ع أسئلة جميلة والي بتدل على جهله الخطير للفكرة الي عم حاول يزرعها بعقول الجيل الجديد والي هوي مو فهمان منها غير إنه ع أساس شي علمي بيأكد صدق الإلحاد وعدم وجود خالق ولازم ننشره للشباب االسوري

يمكن ما بقى يخفى على حدا توجهات الصفحة تماما من التأكيد على الإلحاد و دعم الشذوذ و كان سبب إلغائي بالإعجاب فيها لإنه عندي مصادر أكثر مصداقية لأي بحث مهتمة فيه من صفحة دون المستوى المطلوب .. طبعا أي حدا معه الحرية الكاملة بإنه ينشر توجهاته بغض النظر عن تقبلنا إلها أو لأ ونحن معنا حرية نعمل لايك أو أنلايك وهاد الي عملته أنا وبتمنى كمان محبين الصفحة يتقبلوا نقدي بهالبوست متل ما أنا تقبلت حرية الصفحة بإنها تنشر الي بدها ياه
أول شي رح رجحلكم هي الصفحة ع الفيسبوك الي فيها نقض تفصيلي لنظرية التطور (وليس الاصطفاء الطبيعي) بأمثلة علمية دقيقة مع ملاحظة إنه الصفحة بتدعم نظرية التصميم الذكي و الي مارح ادخل هلأ بتفاصيلها
https://www.facebook.com/creation.evoulution.18
طبعا على جوجل بتلاقوا مئات المصادر الي ممكن تستفيدوا منها كمان بهاد الموضوع سواء المؤيد أو المعارض ومنها سلسلة ع اليوتيوب لصديقي وزميلي بالجامعة عدنان الحاج الي حكى بعدة حلقات عن شخصية داروين ونظرية التطور على المستويين الميكرو والماكرو

الأسئلة البديهية الي ممكن يسألها أي إنسان كتيرة بس رح ناقش وحدي منها لإنها أساس الإلحاد أو الايمان ومع الأيام كل فترة وفترة رح نزل سؤال يبين ضعف هالفرضية :

1- أصل كل هالأنواع هي خلية … طيب هالخلية كيف تكونت ؟
والله صدفة , طيب تعالوا نشوف هالصدفة يا شباب مع حساب نسبة احتمال حدوثها :

مؤيدي نظرية التطور كانوا يؤمنوا بإنه هالخلية بسيطة جدا ومنها نشأت الأنواع والعلم الحديث أثبت إنها معقدة جدا لدرجة إنه الفهمان فيهم صار يقول إنه خلص في خالق لهلخلية بس نظرية التطور من هالخلية صحيح !!!!

هي الخلية تتكون من البروتين كأحد أهم مكوناتها, والبروتين مركب كيماوي من خمسة عناصر هي الكربون والهيدروجين والنتروجين والأوكسجين والكبريت بيندمجوا مع بعض في تفاعلات معقدة , ووضعهم بترتيب دقيق , بس للحصول على جزيء واحد من البروتين . . . ويشمل الجزيء البروتيني الواحد أربعين ألفا من ذرات هذه العناصر, تتجمع فى (سلاسل) طويلة من الأحماض الأمينية Amino-Acids التى يجب ان تجتمع مع بعضها البعض بطريقة معينة لو حادت عنها لاصبحت سما قاتلا ، بدل أن تصبح موجدة للحياة. .. انتبهتوا ؟ تغيير بسيط بالتركيت أو بالشروط أو ماتكون درجة الحرارة مناسبة بتتحول لسم قاتل مو لخلية حية !!!!
البرفسور : G.B.Leathes أكد إنه مستحيل أي صدفة تقدر تجمع هيك سلاسل والبعض من العلماء قرر يحسب بالورقة والقلم هي الصدفة مو بس يستنتج متل البرفسور ليذس

قام العالم شارلز إيجين جاي بحساب احتمال التكون بعامل المصادفة لجزيء بروتين واحد، فوجد أن هذا يمكن أن يحدث مرة كلما مرَّت فترة زمنية لاتقل عن 10 أس (243) من السنوات، وهذا الرقم خطيرررررررررر …. صعب تتخيلوا ولو تخيل حجم هالرقم , تخيلوا حتى عمر الكون كامل 15 مليار بيطلع ولا شي قدام هالرقم , رقم جوجل كأكبر رقم اختاروه البشر بيطلع 10 بالأس 100 فما باالكم ب 10 بالأس 243، وهذا هو احتمال تكون جزيء واحد فقط من البروتين غير المتخصص
في العام 1962م، قاما عالما الكيمياء الحيوية ماكولم ديكسون، أيدويب بحساب احتمال تكون جزيء البروتين ذاتياً نتيجة مجرد التقاء جزيئات أحماض أمينية في مخلوط منها ـ وقد تبيَّن أن هذا الاحتمال لكي يتحقق يقتضي حجماً من مخلوط الأحماض الأمينية المعروفة يصل إلى أضعاف حجم الكرة الأرضية بمقادر 10 أس(50) ضعفاً كل ذلك لمجرد تكون جزيء بروتين واحد من النوع العادي غير المتخصص، أما احتمال تكون جزيء بروتين متخصص مثل الهيموغلوبين، فإن الحساب قد وصل إلى ضرورة توافر حجم من مخلوط الأحماض الأمينية لا يقل عن 10أس (512) ضعف حجم الكون كله !!!!!!!!!!!

نقطة تانية : عمر المادة الي هي مصدر الخلية برأي الملحدين قديم جدا جدا (قدم المادة )حسب مقالاتهم الكثيرة عن الفطرة والانتخاب الطبيعي بس قررت ما تتفاعل ولا تعطي أي شكل من الحياة إلا من شي 550 مليون سنة بما يسمى عصر كامبري أوعصر كامبريان Cambrian period
المذهل أكثر إنه بعصر كامبري ضلت أشكال الحياة البسيطة من أشنيات وغيرها ل 540 مليون سنة وفجأة صار ما يسمى بإنفجار كامبري بآخر 10 ملايين سنين فقط وهالانفجار أدى إلى ظهور كل أشكال هالكائنات الحية الي بنشوفها حاليا على كوكب الأض …

هي الخلية الصدفة الخطيرة أدت لنشوء 5.7 مليون جنس حي ع الأرض , بعضهم بيتكاثر بالبيض وبعضهم قرر يصير ثدييات وبعضهم قرر يضل نفسه لملايين السنين وبعضهم قال لا خليني اتطور كم سنة بعدين زعل و وقف التطور هههه و أنا الي مشتهية يطلعلي جناحين طير فيهم ضحكوا عليي البشر بطيارة ههههه …… مارح اقلب الموضوع لمزح كتير , رح ناقش هي المواضيع بالتفصيل بالمستقبل ببوستات لاحقة
ويا شباب لا تاخدوا المعلومات بس مني أو من غيري , ابحثوا بنفسكم عن الأجوبة والنت مليان مقالات علمية بكل الللغات عن هالموضوع الشيق

ملاحظة أخيرة : تدريسها بالجامعات العالمية لا يعني مصداقيتها , في كتير أسباب بتخلي هيك نظرية تتدررس ومنشان ما ندخل بنظريات المؤامرة , بكفي إنها فرضية ويجب تدريسها من باب العلم وتكريم لعالم قضى 5 سنين من عمره بالبحث العلمي , داروين …. وما ذنبه إذا إجا ناس بعده وتبنت نظريته كحقيقة علمية مطلقة بس لإنكار الخالق